لاہور(ڈیلی پوائنٹ )ملک بھر میں 9 محرڈم الحرام کے جلوس جھوٹے اور بڑوں شہروں سے برآمد ہو رہے ہیں جبکہ مجالس منعقد اور نوحہ خانی کی جارہی ہے۔ جلوس کے راستوں پر سیکیورٹی کے غیرمعمولی انتظامات کیے گئے ہیں اور بیشتر شہروں میں موبائل سروس بھی معطل ہے۔
روہڑی
روہڑی میں ساڑھے 500 سالہ قدیمی کربلا معلی کا نوڈھالہ تعزیہ جلوس منڈو کھبڑ پہنچ گیا، نماز ظہرین کے بعد جلوس دوسرے مرحلے میں دوسری منزل کے لیے برآمد ہو گا۔
اسلام آباد
اسلام آباد میں جلوس امام بارگاہ اثناء عشری سیکٹر جی 6 سے برآمد ہو گا۔ جلوس روایتی راستوں سے ہوتا ہوا امام بارگاہ اثناء عشری پر ہی اختتام پزیر ہو گا۔
کراچی
کراچی میں 9 محرم الحرام کا مرکزی جلوس دن ڈیڑھ بجے نشتر پارک سے برآمد ہو گا۔ دوپہر 12 بجے کے بعد نشتر پارک میں مرکزی مجلس ہو گی اور مجلس کے بعد جلوس نشتر پارک سے برآمد ہو گا۔
9 محرم کےجلوس کیلئے سیکیورٹی کے سخت انتظامات ہیں۔ سیکیورٹی پر4 ہزار200 سے زائد پولیس اہلکارتعینات ہوں گے۔
علاوہ ازیں رینجرز کےدستے بھی سیکیورٹی میں پولیس کی معاونت کریں گے، جلوس کے راستوں میں آنے والی مارکیٹس کو سیل کردیا گیا جبکہ بلند وبالاعمارتوں پرشارپ شوٹربھی تعینات کئے جائیں گے۔
کراچی میں جلوس کے راستوں میں موبائل فون سروس معطل رہے گی۔ کراچی میں 9 اور 10 محرم کو ڈبل سواری پر پابندی ہے۔
لاہور
لاہور میں 9 محرم الحرام کیلئے 378 مجالس اور 79 عزاداری جلوسوں کو سیکیورٹی فراہم کی جارہی ہے۔ سکیورٹی کیلئے 11 ہزار سے زائد اہلکار فرائض سرانجام دے رہے ہیں۔
21 ایس پیز، 18 ایس ڈی پی اوز اور 46 ایس ایچ اوز تعینات ہوں گے جبکہ شرکا کو تین درجاتی حصار پر مبنی سکیورٹی فراہم کی جا رہی ہے۔
واک تھرو گیٹس، میٹل ڈیٹیکٹرز سمیت جدید آلات سے سکیورٹی کو یقینی بنایا جا رہا ہے، خواتین عزاداروں کی سکیورٹی کیلئے لیڈی پولیس اہلکار تعینات کی گئی ہیں۔
ڈولفن اسکواڈ، پی آر یو اور ایلیٹ فورس کی ٹیمیں روٹس کے اطراف پٹرولنگ کریں گی۔
پشاور
پہلا ماتمی ذوالجناح جلوس امام بار گاہ حسنیہ ہال صدر سے 10 بجے برآمد ہوگا جبکہ دوسرا جلوس امام بارگاہ بی بی صاحبہ سے 3 بجے برآمد ہوگا۔
14 ہزار سے زائد سیکیورٹی اہلکار تعینات کئے گئے ہیں۔ پشاور کے مختلف امام بارگاہوں کے 16جلوس علم بھی ہوں گے جس کے لیے پشاور صدر اور اندرون شہر کو سیل کردیا گیا ہے جبکہ جلوس کے علاقوں میں موبائل سروس بھی معطل ہے۔
شہر بھر میں 14 سے زائد سیکیورٹی اہلکار تعینات ہے جبکہ عزادار سینہ کوبی اور زنجیر زنی بھی کریں گے جس کے لیے موبائل ہیلتھ یونٹ کے ساتھ ریسکیو اہلکار بھی موجود ہیں۔ شہر کے داخلی و خارجی راستوں پر پولیس کی ناکہ بندی کی گئی ہے جبکہ کنٹرول روم میں سی سی ٹی وی کیمروں کے ذریعے نگرانی جاری ہے۔
ڈی آئی خان
ڈی آئی خان میں نویں محرم الحرام کی مناسبت سے مرکزی جلوس امام بارگاہ بمو شاہ سے 9 بجے برآمد ہو گیا، شہر سے آج 4 ماتمی جلوس برآمد کیے جائیں گے۔
دادو
دادو میں آج 62 مجالس اور 55 ماتمی جلوس برآمد ہوں گے۔ ایس ایس پی کے مطابق ضلع بھر میں سیکیورٹی کے فول پروف انتظامات کیے گئے ہیں، 2 ماتمی جلوس انتہائی حساس جبکہ 16 حساس قرار دیے گئے ہیں۔
9 محرم الحرام کے جلوس، سیکورٹی سخت ، موبائل سروس معطل
