اسلام آباد(ڈیلی پوائنٹ)پاکستان تحریک انصاف کے کارکنوں کو عدالت نے فوری رہا کرنے کا حکم جاری کردیا ہے. عدالت نے پی ٹی آئی کے 52کارکنوں کی ضمانت منظور کرتے ہوئے ان کو فوری رہا کرنے کا حکم دے دیا ہے.
انسداد دہشت گردی عدالت نے آج 26 نومبر احتجاج کے دوران توڑ پھوڑ اور دیگر الزامات سے متعلق کیس کی سماعت کی. انسداد دہشت گردی عدالت اسلام آباد کے جج ابوالحسنات ذوالقرنین نے تحریری فیصلہ جاری کردیا۔ فیصلے میں کہا گیا ہے کہ ریکارڈ کے مطابق درخواست گزار ملزمان ایف آئی آر میں نامزد نہیں۔ درخواست گزار ملزمان کو تفتیش مکمل ہونے کے بعد جوڈیشل ریمانڈ پر جیل بھیجا گیا۔ بادی النظر میں ملزمان کے خلاف مزید انکوائری کا کیس ہے۔
فیصلے کے مطابق ملزمان پر الزام کا تعین صرف شواہد ریکارڈ کرنے کے بعد کیا جا سکتا ہے۔ ملزمان کے وکیل کے مطابق ملزمان کا مقدمے کے ساتھ تعلق نہیں جوڑا جاسکا۔ پراسیکوٹر نے ضمانت کی مخالفت کرتے ہوئے کہا ملزمان گھناؤنے جرم میں ملوث ہیں۔ پراسیکوٹر کے مطابق ملزمان کو شناخت پریڈ میں گواہوں نے شناخت کیا۔
عدالت کا یہ بھی کہنا تھا کہ پراسیکوشن عدالت کو مطمئن کرنے میں مکمل طور پر ناکام رہی.
پاکستان تحریک انصاف کے کارکنوں کو عدالت نے فوری رہا کرنے کا حکم
