کراچی (ڈیلی پوائنٹ )ٹیسلا سے 15 ہزار ملازمین کو فارغ کرنے کا فیصلہ،ایلون مسک نے منافع کی ادائیگی اور انکریمنٹ روک دیا، مینیجرز کو فہرستیں تیار کرنے کی ہدایت
الیکٹرک کاریں تیار کرنے والے بڑے امریکی ادارے ٹیسلا نے سیلز میں غیر معمولی کمی کے باعث دنیا بھر میں کم و بیش 15 ہزار ملازمین کو فارغ کرنے کا فیصلہ کیا ہے۔
کمپنی کے مالک ایلون مسک نے ٹیسلا کے تمام مینیجرز کے نام ایک انٹرنل میمو میں کہا ہے کہ تمام شعبوں کا بھرپور جائزہ لے کر طے کیا جائے کہ کس کس کو فارغ کیا جاسکتا ہے۔ ابتدائی تخمینے میں 10 فیصد ملازمین کو فارغ کرنے کا فیصلہ کیا گیا ہے۔
ہائی ٹیک سیکٹر کے جریدے ”الیکٹریک“ نے بتایا ہے کہ ایلون مسک نے انٹرنل میمو کے ذریعے شیئر ہولڈرز کو منافع کی ادائیگی معطل کرنے کے ساتھ ساتھ سالانہ انکریمنٹ کا معاملہ بھی رُکوادیا ہے۔
ٹیسلا کے معاملات پر نظر رکھنے والے ماہرین کہتے ہیں کہ چین نے الیکٹرک کاروں کی دنیا میں ٹیسلا کے لیے غیر معمولی مشکلات پیدا کی ہیں۔ ٹیسلا کے لیے پیداواری صلاحیت بڑھانا اور منافع کمانے کی صلاحیت برقرار رکھنا بڑا چیلنج بن گیا ہے۔
ٹیسلا سے 15 ہزار ملازمین کو فارغ کرنے کا فیصلہ
