الیکشن وقت پرہونگے؟ نواز شریف کادورہ لیہ اچانک منسوخ

لاہور(ڈیلی پوائنٹ ) الیکشن 2024 وقت پر ہوں گے یانہیں ایسا کچھ ابھی کہا نہیں جاسکتا، کیونکہ ابھی پورے ملک میں الیکشن کاماحول نہیں بنا، پی ٹی آئی کو الیکشن مہم شروع کرنے نہیں دی جارہی ہے۔ دوسری جانب پاکستان مسلم لیگ (ن) کے قائد نواز شریف نے لیہ کا دورہ منسوخ کردیا۔
پارٹی ذرائع کا کہنا ہے کہ نواز شریف نے موسم کی خرابی کی وجہ سے دورہ منسوخ کیا ہے۔ خیال رہے کہ آج نواز شریف کو لیہ میں عوامی اجتماع سے خطاب کرنا تھا۔
واضح رہے کہ حافظ آباد میں بھی نواز شریف نے جلسے سے مختصر خطاب کیا تھا جس میں بلند و بانگ دعوے نہیں کیے گئے تھے۔
امکان ظاہر کیا جارہا تھا کہ مختصر خطاب کی ایک وجہ یہ ہو سکتی ہے کہ وہ فی الحال کوئی بیانیہ نہیں بنانا چاہتے اور آئندہ ماحول کو دیکھ کر اس بیانیے کےلیے گنجائش رکھنا چاہتے ہیں۔