کراچی(ڈیلی پوائنٹ):پی ایس ایل 9 کے فائنل میں ملتان سلطانز نے ٹاس جیت کر اسلام آباد یونائیٹڈ کے خلاف کر پہلے بیٹنگ کا فیصلہ کیا ہے۔نیشنل اسٹیڈیم کراچی میں میچ کا آغاز رات 9 بجے ہوگا جس کے لیے انتظامات کو حتمی شکل دے دی گئی ہے۔ امکان یہ بتایا گیا ہے کہ فائنل میچ میں وکٹ بیٹنگ کے ساتھ ساتھ بولرز کے لیے بھی مددگار ثابت ہوگی۔
اسٹیڈیم کے مختلف انکلوژر میں نشستوں کی از سر نو تزین و آرائش کی گئی، اسٹیڈیم میں صفائی ستھرائی کا خصوصی اہتمام کیا گیا، تماشائیوں کو زیادہ سے زیادہ بہتر سہولیات فراہم کرنے کے لیے انتظامات کا بھی جائزہ لیا گیا۔
فائنل کے موقع پر سیکورٹی کے سخت ترین انتظامات جبکہ اسٹیڈیم کے اطراف شاہراؤں اور سڑکوں پر ٹریفک کو رواں دواں رکھنے کے لیے مربوط پلاننگ کی گئی ہے۔اسٹیڈیم میں جعلی ٹکٹوں کی فروخت کی روک تھام کے لیے بھی لائحہ عمل تیار کر لیا گیا ہے جس کے تحت پی سی بی کے سیکیورٹی اہلکار اسٹیڈیم میں خصوصی گشت کریں گے اور داخلہ دروازوں پر مشکوک افراد پر نگاہ رکھیں گے۔
فائنل اور اختتامی تقریب میں پی سی بی کے چیئرمین محسن نقوی مہمان خصوصی ہوں گے اور مقابلے کے اختتام پر انعامات تقسیم کریں گے۔
یاد رہے کہ چوتھی بار فائنل میں جگہ بنانے والی ملتان سلطانز کو دو مرتبہ لاہور قلندرز کے ہاتھوں شکست ہوئی ہےجبکہ اسلام آباد یونائٹیڈ دو بار فائنل میں پہنچ چکی ہے اور دونوں مرتبہ کامیاب رہی ہے۔
ملتان سلطانز کے اسکوڈ میں محمد رضوان (کپتان اور وکت کیپر)، یاسر خان، عثمان خان، جانسن چارلس، افتخار احمد، خوشدل شاہ، کرس جارڈن، ڈیوڈ ولی، اسامہ میر، محمد علی، عباس آفریدی شامل ہیں۔
اسلام آباد یونائیٹڈ کے اسکواڈ میں کولن منرو، مارٹن گپٹل، سلمان علی آغا، شاداب خان (کپتان)، اعظم خان (وکٹ کیپر)، حیدر علی، عماد وسیم، فہیم اشرف، نسیم شاہ، حنین شاہ، عبید میک کوئے شامل ہیں۔
ُPSL9 ؛ فائنل میں ملتان سلطانز نے اسلام آباد یونائیٹڈ کیخلاف بیٹنگ کا فیصلہ کر لیا
