اسلام آباد(ڈیلی پوائنٹ )بانیٔ پی ٹی آئی کے اثاثوں میں گزشتہ 5 برس میں ہونے والے اضافے کی تفصیلات سامنے آ گئیں۔بانیٔ پی ٹی آئی کے اثاثوں میں گزشتہ 5 برس میں 27 کروڑ 72 لاکھ 55 ہزار روپے سے زائد کا اضافہ ہوا، 2018ء میں ان کے اثاثوں کی مالیت 3 کروڑ 86 لاکھ 94 ہزار روپے تھی۔
بانیٔ پی ٹی آئی کے کاغذاتِ نامزدگی کے مطابق 2023ء میں اثاثوں کی مالیت 31 کروڑ 59 لاکھ 50 ہزار روپے سے زائد تھی، انہوں نے کاغذاتِ نامزدگی میں زمان پارک لاہور میں 7 کنال 8 مرلے کا گھر وراثت میں ظاہر کیا۔
بانیٔ پی ٹی آئی نے کاغذات میں زمان پارک کے گھر کی تعمیر پر 4 کروڑ 86 لاکھ روپے سے زائد کا خرچہ ظاہر کیا۔
سابق وزیرِ اعظم نے کاغذات میں ظاہر کیا کہ بنی گالا میں 300 کنال اراضی بطور تحفہ وصول کی۔
کاغذات میں بنی گالا کے گھر کی تزئین و آرائش اور ریگولرائزیشن کی مد میں 39 لاکھ روپے سے زائد کا خرچ ظاہر کیا گیا۔
کاغذات میں اسلام آباد کے علاقے مہرہ نور میں 50 لاکھ روپے مالیت سے زائد کی 6 کنال 16 مرلے اراضی ظاہر کی گئی جبکہ اسلام آباد کے شاپنگ پلازہ میں 12 کروڑ روپے سے زائد مالیت کی دکان بھی ظاہر کی گئی ہے۔
کاغذات میں 3 کروڑ 40 لاکھ روپے سے زائد مالیت کا 2 کمروں کا فلیٹ بھی اسلام آباد کے پلازہ میں ظاہر کیا گیا ہے۔
بانیٔ پی ٹی آئی نے بھکر میں وراثت میں ملی 188 کنال اراضی بھی کاغذات میں ظاہر کی ہے۔
بانیٔ پی ٹی آئی کے کاغذات میں کہا گیا ہے کہ وہ کسی ایک گاڑی کے مالک نہیں ہیں جبکہ 3 کروڑ 15 لاکھ روپے سے زائد نقد رقم ان کے پاس موجود ہے۔
کاغذات میں اسلام آباد کے مختلف بینک اکاؤنٹس میں 6 کروڑ روپے سے زائد کی رقم ظاہر کی گئی ہے جبکہ 2 لاکھ روپے کی 4 بکریاں بھی ان کی ملکیت بتائی گئی ہیں۔
کاغذات میں توشہ خانے سے خریدی گئی قیمتی اشیاء کی قیمت 1 کروڑ 18 لاکھ 77 ہزار سے زائد ظاہر کی گئی ہے، اہلیہ بشریٰ بی بی کے نام پاکپتن اور دیپالپور میں 698 کنال اراضی ظاہر کی گئی ہے۔
بشریٰ بی بی کے نام بنی گالا میں 3 کنال کا گھر بھی بانیٔ پی ٹی آئی کے کاغذات میں ظاہر کیا گیا ہے۔
بانیٔ پی ٹی آئی نے ایف بی آر کو 2021ء میں 14 کروڑ 10 لاکھ روپے سے زائد کے اثاثے ظاہر کیے تھے، 1 سال کے دوران 2022ء میں ان کے اثاثوں کی مالیت بڑھ کر 32 کروڑ روپے سے زائد ہو گئی۔
ایف بی آر کے سرٹیفکیٹ کے مطابق بانیٔ پی ٹی آئی نے 2023ء میں اثاثوں کی مالیت 31 کروڑ 59 لاکھ روپے ظاہر کی تھی۔
بانیٔ پی ٹی آئی نے کاغذات میں اپنی تعلیمی قابلیت پولیٹیکل سائنس میں بی اے ظاہر کی ہے جبکہ اپنا موجودہ پیشہ فلنتھروپسٹ ظاہر کیا ہے۔
عمران خا ن کے اثاثے5 برسوں میں بڑھے یاکم ہوئے؟
