ایف بی آر نے ہدف سے زیادہ ٹیکس جمع کیا،شمشاد اختر

کراچی ( ڈیلی پوائنٹ )نگراں وزیر خزانہ شمشاد اختر کا کہنا ہے کہ فیڈرل بورڈ آف ریونیونے پہلے 3 مہینے میں انٹرنیشنل مانیٹری فنڈز کےٹارگٹ سے زیادہ کلیکشن کی ہیں، حکومت چلانے کے لیے ہمیں پیسا چاہیے۔
کراچی میں پریس کانفرنس کرتے ہوئے نگراں وزیر خزانہ نے کہا کہ ڈالر کے مقابلے میں روپے کی قدر میں بہتری آئی ہے، معیشت کی بہتری کے لیے اقدامات کیے جا رہے ہیں۔
نگراں وزیر خزانہ نے کہا کہ معاشی مسائل کا حل اولین ترجیح ہے، نگراں حکومت نے بہت جلد مسائل کو پہچانا ہے، نگراں حکومت آئی تو معیشت مشکلات کا شکار تھی، حکومتی اقدامات سے معاشی صورتحال میں بہتری آرہی ہے۔
شمشاد اختر نے کہا کہ بحرانوں کے باوجود معیشت کو بحال رکھنے کی کوشش کی، کرنسی کا غلط استعمال کرنا غیر قانونی ہے، اسے روکنا حکومتی ذمہ داری ہے، زراعت کے شعبے پر توجہ دے کر معاشی مسائل سے نکالا جا سکتا ہے۔انہوں نے مزید کہا کہ یہ نہیں کہتی مہنگائی کو ختم کیا، توجہ کے ساتھ مہنگائی کو قابو کرنے کیلئے کوشش کی، اسمگلنگ کو روکنے کے لیے اقدامات کیے جا رہے ہیں۔