لڑکی نے سب سے زیادہ سویٹر پہن کر عالمی ریکارڈ بنا دیا

امریکہ(ڈیلی پوائنٹ)ایک امریکی لڑکی نے ایک وقت میں سب سے زیادہ سویٹر پہن کر نہ صرف لوگوں بلکہ گنیز ورلڈ ریکارڈ کی توجہ بھی حاصل کر کے عالمی ریکارڈ بن گیا۔گنیز ورلڈ ریکارڈز کے مطابق واشنگٹن سے تعلق رکھنے والی صوفیہ ہیڈن نے بیک وقت 45 سویٹر پہن کر اس ریکارڈ کو توڑ دیا ہے جو اس سے قبل بنا تھا۔
ادارے کا کہنا ہے کہ صوفیہ نے ایک ایک کر کے سویٹر پہنے جن کا سائز ایک دوسرے سے مختلف تھا۔
ان کے لیے ضروری تھا کہ وہ ہر سویٹر کو درست طور پر پہنتے ہوئے کمر تک لائے اور پھر دوسرا سویٹر پہنے، اس دوران اگر کوئی سویٹر پھٹ جاتا تو اس کو گنتی میں شمار نہیں کیا جانا تھا۔اس سے قبل بنائے جانے والے ریکارڈ میں 40 سویٹر پہنے گئے تھے جو ایک 11 برس کے لڑکے تھامس ہوکٹ اوممبو نے 2022 میں بنایا تھا اور ان کا تعلق فرانس سے تھا۔
صوفیہ اپنے خاندان میں پہلی فرد نہیں ہیں جنہوں نے عالمی ریکارڈ توڑا ہے ان کی والدہ الیسنڈرا بھی اس وقت کروشیا کی طویل ترین بُنائی کا عالمی ریکارڈ رکھتی ہیں۔
انہوں نے اپنی بیٹی کے ریکارڈ کے حوالے سے بتایا کہ ’اس کوشش کے لیے اتنی بڑی تعداد اور سائز میں سوئٹرز کو جمع کرنے میں کافی وقت لگا اور ان کو مختلف سٹورز سے خریدا گیا۔‘صوفیہ کی جانب سے ریکارڈ بنانے کا مظاہرہ ان کی ذاتی لائبریری میں کیا گیا اور کامیابی سے ریکارڈ بنانے کے بعد انہوں نے تمام سویٹر چیرٹی میں دے دیے۔
زیادہ سویٹر پہننے کا ریکارڈ پہلی بار 2014 میں سامنے آیا تھا اور اس کا مظاہرہ جمی کیمیل لائیو میں ہوا تھا جس میں گلرمو روڈریگوز نے ایک وقت میں 25 سویٹر پہنے تھے۔