لاہور(ڈیلی پوائنٹ) پاکستان کے معروف فلم سٹار اور اداکار میکال ذوالفقار نے انکشاف کیا کہ انہیں اب تک کئی خواتین کی طرف سے ریجیکشن مل چکی ہے.حال ہی میں میکال ذوالفقار نے نجی ٹی وی کے مزاحیہ شو میں بطور مہمان شرکت کی.جہاں انہوں نے مردوں کو اکثر اوقات خواتین کی جانب سے ملنے والی ریجیکشن سے متعلق بات کی.
میکال ذوالفقار نے انکشاف کیا کہ مجھے متعدد بار خواتین مسترد کر چکی ہیں۔ انہوں نے بتایا کہ ابھی حال ہی میں ایک خاتون نے مجھے یہ کہہ کر مسترد کیا ہے کہ وہ پہلے سے ہی کسی اور میں دلچسپی رکھتی ہیں۔اداکار نے یہ بھی کہا کہ مجھے لگتا ہے کہ لوگ مجھ سے ڈرتے ہیں حالانکہ میں ایک بہت سادہ اور شریف انسان ہوں، شاید میں اداکار ہوں اس لیے مجھے لوگ صحیح سمجھ نہیں پاتے۔
میکال ذوالفقار نے کہا کہ مجھے مداح ہالی وڈ اداکار بریڈ پٹ سے مشابہ قرار دیتے ہیں جو مجھے بہت اچھا لگتا ہے، حیرت کی بات ہے کہ آج تک مجھے کسی نے کسی بالی وڈ فنکار کے ساتھ مشابہ قرار نہیں دیا، لوگ بالی وڈ چھوڑ کر مجھے ہالی وڈ فنکاروں کے ساتھ ملاتے ہیں۔
