ہیڈکوچ ملتان سلطانز نے ٹیم کی کامیابی میں کپتان کا کردار سب سے اہم قرار دے دیا

(ڈیلی پوائنٹ) ملتان سلطانز کے ہیڈ کوچ عبدالرحمان نے ٹیم کی کامیابی میں کپتان کا کردار سب سے اہم قرار دے دیا۔ ملتان سلطانز کے ہیڈ کوچ کا کہنا تھا کہ ملتان کی ٹیم کی سب سے اچھی بات یہ ہے کہ وہ پی ایس ایل ڈرافٹ کے دن سے اپنا کام شروع کردیتی ہے۔انہوں نے کہا کہ ہم نے ٹیم بناتے وقت بڑے نام نہیں سوچتے بلکہ یہ سوچتے ہیں کہ کون کہاں ہمارے کام آسکتا ہے۔
ان کا مزید کہنا تھا کہ مقامی کھلاڑیوں میں ان کھلاڑیوں کو ترجیح دی ہےجن کے ساتھ پہلے کام کیا ہوا ہے اور میچ کے مزاج کو سمجھتے ہیں۔ملتان سلطانز کے ہیڈ کوچ کا کہنا تھا کہ ٹیم کی کامیابی میں کپتان کا کردار سب سے اہم ہوتا ہے، گراؤنڈ میں وہی ٹیم کو لڑاتا ہے۔ ٹی20 میں صورتحال تیزی سے بدلتی ہے ایسے میں صحیح وقت پر صحیح فیصلہ اہم ہوتا ہے۔ محمد رضوان نے چار سال میں لگاتار لا جواب کپتانی کی ہے۔
ان کا کہنا تھا کہ جب آپ ٹرافی جیتنا چاہتے ہیں تو یہ نہیں دیکھتے کہ سامنے کون سی ٹیم ہے، اسلام آباد کی خوبیوں اور کمزوریوں سے واقف ہیں اس کے مطابق پلان بنایا ہے۔ کوچنگ میں ڈیٹا کے استعمال سے کافی مدد مل جاتی ہے، عام طرز کی کوچنگ میں حریف کا اندازہ لگایا جاسکتا ہے مگر ڈیٹا ہو تو اس کی واضح تصویر سامنے آتی ہے۔کبھی کبھار کنڈیشن ڈیٹا سے مختلف ہوسکتی ہے اس لیے ہر بار اس پر انحصار بھی نہیں کیا جاتا۔ آج کل کی کرکٹ میں ڈیٹا کا کردار کافی اہم ہے۔