ورلڈکپ سے باہر لیکن پاکستان ٹیم کو کتنے کروڑ روپے ملیں گے؟

لاہور( ڈیلی پوائنٹ ) انٹرنیشنل کرکٹ کونسل (آئی سی سی )کے زیر اہتمام کرکٹ ورلڈ کپ 2023ء سے باہر ہونے کے باوجود پاکستان ٹیم کو کروڑوں روپے ملیں گے آپ سب جان کر حیران رہ جائیں گے۔
بھارت میں جاری ورلڈکپ 2023ء میں پاکستان نے گروپ اسٹیج کے 9 میں سے 4 میچز میں کامیابی کے ساتھ 8 پوائٹس حاصل کئے اور ایونٹ کا پانچویں پوزیشن کے ساتھ اختتام کیا۔
آئی سی سی نے ورلڈکپ کے لیے مجموعی انعامی رقم 10 ملین ڈالرز رکھی ہے۔
آئی سی سی نے ورلڈکپ میں ہر ٹیم کیلئے فی میچ کامیابی پر 40 ہزار ڈالرز کی رقم رکھی ہے جبکہ گروپ مرحلے سے باہر ہونیوالی ٹیم کو ایک لاکھ ڈالر ملیں گے۔
قومی کرکٹ ٹیم نے ورلڈکپ 4 میچز میں کامیابی حاصل کی، پاکستان کو 4 میچ جیتنے پر ایک لاکھ 60 ہزار ڈالرز جبکہ گروپ مرحلے کے ایک لاکھ ڈالر ملیں گے۔
انٹرنیشنل کرکٹ کونسل کے فارمولے کے مطابق ورلڈکپ میں گروپ مرحلے میں باہر ہونیوالی پاکستانی ٹیم کو مختص انعامی رقم میں سے مجموعی طور پر 2 لاکھ 60 ہزار ڈالرز (7 کروڑ 46 لاکھ روپے سے زائد) ملیں گے۔
واضح رہے کہ آئی سی سی کی جانب سے سیمی فائنل ہارنے والی ٹیموں کو 8، 8 لاکھ ڈالرز ملیں گے، ورلڈکپ کی رنر اپ ٹیم کو 20 لاکھ جبکہ میگا ایونٹ کی فاتح ٹیم کو 40 لاکھ ڈالرز ملیں گے۔