سندھ کابینہ میں بڑی تبدیلیوں کا امکان ہے اور ذرائع کے مطابق وزیر بلدیات سعید غنی سے ان کا محکمہ واپس لینے کا فیصلہ کر لیا گیا ہے۔
تفصیلات کے مطابق وزیر اعلیٰ سندھ مراد علی شاہ سے صوبائی وزرا کی مشاورت جاری ہے، اور آئندہ چند روز میں کابینہ میں نمایاں رد و بدل متوقع ہے۔ ذرائع کا کہنا ہے کہ سعید غنی، جام خان شورو اور اسماعیل راہو نے اس سلسلے میں وزیر اعلیٰ سے ملاقات بھی شیڈول کر رکھی ہے۔
ذرائع نے بتایا ہے کہ صوبائی وزیر محنت سندھ، شاہد تھہیم کو وزارت سے ہٹانے کا فیصلہ کیا گیا ہے، اور ان کی جگہ بدین سے تعلق رکھنے والے رکن صوبائی اسمبلی اسماعیل راہو کو وزارت دیے جانے کا امکان ہے۔
اس کے علاوہ، کابینہ میں اہم کردار ادا کرنے والے وزیر سعید غنی سے محکمہ بلدیات کا قلمدان واپس لینے کی تیاری مکمل کر لی گئی ہے۔ جبکہ جام خان شورو کو اضافی محکمہ منصوبہ بندی و ترقیات کا چارج دینے کا فیصلہ کیا گیا ہے۔
سیاسی تجزیہ کاروں کا کہنا ہے کہ سندھ کابینہ میں یہ رد و بدل نہ صرف اندرونی سیاسی توازن کو متاثر کرے گا بلکہ آنے والے بلدیاتی و عام انتخابات کے لیے پیپلز پارٹی کی حکمتِ عملی کا حصہ بھی ہو سکتا ہے۔
